Бліскучы фінал года

Летась Самарскай абласной грамадскай арганізацыі беларусаў і ўраджэнцаў Беларусі “Руска-Беларускае Братэрства 2000” споўнілася 15 гадоў — юбілею і прысвячаўся шэраг мерапрыемстваў. А яшчэ і 70-годдзю Перамогі. Мы расказвалі пра вялікі фестываль “Жывем і памятаем”, яго ініцыявалі нашы супляменнікі (“Удзячная памяць нашчадкаў”, 21.01.2016). “Год быў насычаны: каб адзначаць падзеі, патрэбныя былі крэатыўныя ідэі, мы нямала цікавага прыдумалі ды правялі, — гаворыць прэзідэнт суполкі Ірына Глуская. — І што б грамадска важнага ні рабілі, а ўсё паслужыць захаванню і развіццю беларускай культуры, мовы, народных традыцый, звычаяў на самарскай зямлі. Сімвалічна, што ў юбілейны год Юлія Цяплянская і Георгій Курмакоў, лідэры моладзевага крыла суполкі, стварылі сям’ю, прытым мы згадалі традыцыі беларускага вяселля. Дарэчы, такога ў Самарскай вобласці даўно не было”.

З песнямі, танцамі святкавалі ў Самары летась Каляды, Грамніцы, Масленіцу... Увесну ладзілі фэст руска-беларускага мастацтва “Адзінства”: да Дня яднання народаў Беларусі ды Расіі. Увесь год беларускі вакальны ансамбль “Каданс” даваў дабрачынныя канцэрты, на Волзе сустракалі гасцей з Беларусі: з мінскім гуртом “Спадчына” ў Дзень горада дзяўчаты спявалі разам на святочнай сцэне.

Грандыёзным фінальным акордам напрыканцы года, у снежні стаў Гала-канцэрт XI Абласнога беларускага дзіцяча-юнацкага фестывалю-конкурсу мастацтваў “Беларусь — мая песня!” Гэта быў сапраўдны парад талентаў. А спачатку госці знаёміліся з выставай работ выяўленчага і дэкаратыўна-прыкладнога мастацтва — усё там было з беларускім нацыянальным каларытам. “Гала-канцэрт — гэта вяршыня фестывалю, — удакладніла Ірына Глуская, яго заснавальніца і старшыня журы. — Паўдзельнічаць запрасілі лепшых выканаўцаў беларускіх песень і танцаў”. З кожным годам павышаецца майстэрства юных выканаўцаў, прадаўжае яна. У тым вялікая заслуга педагогаў: гэта мастацкі кіраўнік “Каданса” Іна Сухачэўская, а таксама Ірына Ключнікава, Наталля Ганчарова, Наталля Меліхава з Цэнтра пазашкольнай адукацыі “Творчасць”, Маргарыта Варанецкая і Кацярына Стрынакова з 36-й і 80-й школ, многія іншыя.

Беларуская музыка, песні, танцы — усё гэта аб’яднаў Гала-канцэрт. Часам здавалася, што і гледачы, і госці, і нават самі яго ўдзельнікі, акунуўшыся ў атмасферу беларускага мастацтва, чароўным чынам перамясціліся ў Беларусь, прытым кожны атрымаў феерверк станоўчых эмоцый. Са мной пагодзіцца кожны, хто хоць раз быў у Самары на падобных імпрэзах. Як хораша, напрыклад, спяваў жартоўную песню “Гэй, у лесе пры даліне” беларуска-армянскі дуэт: Крысціна Сухачэўская ды Ілона Далуханян! Ну так дасціпна яны паказвалі таго камара, які “з дуба ды зваліўся”, і “пабіў камар бакі аб дубовыя сукі/ Ды пабіў камар калені аб дубовыя карэнні”… Своеасаблівым майстар-класам для ўдзельнікаў Гала-канцэрта стала выступленне ансамбля “Каданс”: гучалі песні “Бераг родны”, “Люблю цябе, Белая Русь”, “Сэрца Беларусі” ды іншыя. Цудоўныя галасы, разнажанравыя кампазіцыі на беларускай мове. Некаторыя гледачы перагаворваліся: з якога гэта горада Беларусі прыехалі дзяўчаты? А яны — самарскія.

Паспяхова дэбютавала на фестывалі з песняй “Матуля-Беларусь” шасцігадовая Ірышка Сакалова: яна з цэнтра “Творчасць”, педагог Іна Сухачэўская. Юная артыстка надоўга запомніць бурныя апладысменты. Артыстызм, шчырая любоў да беларускай культуры — гэта было ў аснове кожнага нумара Гала-канцэрта. У праграму журы адабрала 27 нумароў. Усе ўдзельнікі фестывалю-конкурсу адзначаны дыпломамі, атрымалі памятныя падарункі. А ўручалі іх юным артыстам Ірына Глуская, яе намеснік Мікалай Чырко ды Юлія Цяплянская.

Фэстам і завяршылі супляменнікі ў Самары Год літаратуры ў Расіі ды Год моладзі ў Беларусі. Цяпер у іх шмат новых планаў, бо 2016-ы ў Беларусі — Год культуры, у Расіі — Год расійскага кіно, а ў Садружнасці Незалежных Дзяржаў — Год адукацыі. Так што будуць новыя праекты, сустрэчы, канцэрты.