Вянок яго лёсу
Да юбілею класіка беларускай літаратуры, значная частка жыцця якога праходзіла ў Паволжы, рыхтуецца шэраг імпрэзаў у Яраслаўлі. Як вядома, у нашым горадзе Максім Багдановіч жыў найдаўжэй: з 1908-га да ад’езду ў Мінск восенню 1916-га. У 1911-м, закончыўшы гімназію, паступіў у Яраслаўскі юрыдычны ліцэй. Па сутнасці, у яраслаўскі перыяд раскрываўся ягоны паэтычны, пісьменніцкі талент. І гістарычна цалкам апраўдана, што нядаўна ў Яраслаўскім мемарыяльным музеі Максіма Багдановіча ладзіўся літаратурна-музычны салон “Вечар у Багдановіча” — у плыні міжнароднай акцыі “Ноч музеяў”.
У інтэрнэце знаходзім: іхні сын Мікалай Лілееў (1921—31.08.2011) жыў і вучыўся ў Ленінградзе, быў на фронце, трапіў у палон, прайшоў праз лагеры — як фашысцкія, так і савецкія… Напісаў мемуары “Не повезет — не выживешь”: ёсць у нэце. Сябраваў з мінскім Літмузеем Максіма Багдановіча, падарыў туды нямала рэчаў маці. Ганна Рафаілаўна (1890—1961) зберагала адзіны прыжыццёвы зборнік вершаў паэта “Вянок”, які Максім падпісаў, праўда, сябру, брату Ганны Мікалаю Какуеву. А Ганне паэт хацеў прысвяціць зборнік “Палын-трава” — бо гэта паэтычны аповед пра ягонае горкае, неўзаемнае пачуццё…
На “Вечары ў Багдановіча” гучалі рамансы ў выкананні капэлы Яраслаўскага дзяржуніверсітэта імя П. Р. Дзямідава, вершы сучаснікаў Багдановіча — паэтаў Сярэбранага веку. Танцы з мінулай эпохі выконвалі ўдзельнікі Клуба старадаўняга танца і ролевага ўзаемадзеяння “Зазеркалье”, можна было і пагуляць у традыцыйныя салонныя гульні. Займальную пастаноўку паказаў Клуб ролевага, гістарычнага і арт-фехтавання “Альянс”. У аснове дзеі была “Скандынаўская песня” Лявона Вольскага, напісаная ім на аднайменны верш класіка.
І яшчэ адна падзея — таксама са згадкаю пра Багдановіча. 28 мая, у Дзень горада Яраслаўля, наш музей прыняў удзел у рабоце творчай пляцоўкі АртБульвар. Жыхары і госці горада мелі магчымасць наведаць музей бясплатна, даведацца пра жыццё і творчасць беларускага паэта з берагоў Волгі. Ахвочых мы навучалі, як вырабіць сувеніры ў тэхніках беларускай выцінанкі ды роспісу па дрэве.
На заканчэнне дадам: два гэтыя мерапрыемствы толькі распачалі насычаны юбілейны “Год Максіма Багдановіча” ў Яраслаўлі. Будуць іншыя падзеі — на працягу ўсяго года.
Яшчэ фота
