Рус | Бел
У фальварку Ракуцёўшчына прайшло свята паэзіі і песні

У фальварку Ракуцёўшчына прайшло свята паэзіі і песні

03.08.2016      1797

Шчаслівым можа быць лёс не толькі чалавека, але і цэлай краіны, горада, нават самай маленькай вёсачкі. Калі пэўная мясціна сустракаецца з вялікім талентам, геніем чалавека, то можа быць жывой і праслаўленай у вечнасці. Думаецца, менавіта такое шчасце меў і сёння мае невялічкі фальварак Ракуцёўшчына, што на Маладзечаншчыне, бо тут 105 гадоў таму прабавіў лета тады зусім малады паэт, а сёння – наш нацыянальны класік Максім Багдановіч.

Таму не выпадкова Ракуцёўшчына ўжо шмат дзесяцігоддзяў з’яўляецца цэнтрам прыцягнення для многіх творцаў. Паэтаў і музыкаў, мастакоў і народных майстроў. Тут працуе філіял Дзяржаўнага музея гісторыі беларускай літаратуры, які так і называеца – "Фальварак Ракуцёўшчына", тут можна наведаць домік арандатара (менавіта ў ім жыў Максім), завітаць у вялікі дом гаспадара, а таксама выпіць чысцюткай вады з Максімавай крыніцы. Тут можна і выдатна правесці час на штогадовым свяце паэзіі і песні "Ракуцёўскае лета".

Як расказала загадчыца Літаратурнага музея Максіма Багдановіча Марына ЗАПАРТЫКА, сустрэчы ў Ракуцёўшчыне адбываюцца з 1983 года, гэтае свята багатае традыцыямі. Зямля, якая натхніла Багдановіча на яго найлепшыя творы, працягвае штогод збіраць таленты беларускай літаратуры і музыкі.

Дырэктар Дзяржаўнага музея гісторыі беларускай літаратуры Лідзія МАКАРЭВІЧ падкрэсліла:

- Дзіву даешся, калі ўчытаешся ў паэтычныя радкі Максіма, калі ўзгадаеш яго жыццёвы шлях. Як гэты малады чалавек, што ўпершыню ў свядомым узросце прыехаў на Беларусь, але ўжо заявіў пра сябе як беларускі паэт, так пранікнёна пісаў па-беларуску, так жыў нашай культурай і працаваў дзеля беларушчыны. Гэтыя мясціны штогод збіраюць нас разам і здаецца, менавіта гэтыя краявіды спрыяюць творчасці.

Вось і сёлета на "Ракуцёўскім леце – 2016" гучалі вершы і песні ў выкананні маладых і сталых творцаў, прафесіяналаў і аматараў творчасці. Святочны канцэрт доўжыўся больш як чатыры гадзіны, але ні ўдзельнікі, ні госці не адчувалі стомы.

Вельмі сімвалічна, што ў Ракуцёўшчыне творцы адзначылі і 125-годдзе з дня нараджэння Максіма Багдановіча (вялікае юбілейнае свята пройдзе 9 снежня ў Мінску). Як зазначыла намеснік начальніка аддзела ідэалагічнай работы, культуры і па справах моладзі Маладзечанскага райвыканкама Алена САКАЛОЎСКАЯ, для Маладзечаншчыны – вельмі значна, што тут былі напісаны адны з самых лепшых твораў нашага класіка.

Так, тыя два месяцы, што Багдановіч правёў у Ракуцёўшчыне ў 1911 годзе, былі надзвычай плённымі ў яго паэтычнай творчасці. Тут напісана 17 вершаў (у іх ліку - знакамітыя цыклы "Места", "Старая Беларусь") і дзве паэмы ("Вераніка", "У вёсцы"). Думаецца, паэта нахнялі мясцовыя краявіды, доўгачаканая сустрэча з родным краем пасля 15-гадовага расстання, а таксама гутаркі з гаспадаром фальварка Вацлавам Лычкоўскім, дзядзькам Антона і Івана Луцкевічаў, а таксама яго сваякамі, якія ў тое лета таксама тут гасцявалі, сястрой гаспадара Ядвісяй Русецкай і яго пляменніцай Эміліяй Шабуняй з 2-х гадовай дачкой Янінай. Цікава, што на свята ў Ракуцёўшчыну сёлета завітала і сваячка былых уладароў маёнтка Маргарыта ПЯРОВА – унучка Эміліі Шабуні.

- Я шмат разважаю, якімі былі мае продкі, ці добра было Максіму з імі, - падзялілася Маргарыта Сяргееўна, - Яны былі ветлівыя і радыя, што да іх завітаў малады паэт. Я вельмі ганаруся тым, што мая бабка піла гарбату з Максімам Багдановічам, што маю цётку ён насіў на руках, але, на жаль, яна нічога пра гэта не памятала.

Асобна

Стварэнне музея “Фальварак Ракуцёўшчына”, што сёння ўключае дом гаспадара, домік арандатара і гаспадарчыя пабудовы, пачалося ў 1991 годзе і пасля адкрыцця для наведвальнікаў у 1994-м канчаткова было завершана ў 2007-м. Значную ролю ў вывучэнні гісторыі гэтых мясцінаў, лёсаў іх гаспадароў адыграў гісторык, краязнаўца Генадзь Каханоўскі, вынікам гэтых пошукаў сталася кніга “А сэрца ўсё імкне да бацькоўскага краю…”

Аўтар: Марына Весялуха

Яшчэ фота

У фальварку Ракуцёўшчына прайшло свята паэзіі і песні

Каментары да фатаграфій

  1. Пакой Багдановіча ў доміку арандатара.
  2. Адноўлены домік арандатара, у якім Максім Багдановіч пражыў 2 месяцы ўлетку 1911 года. (першае фота)
Вяртанне да спісу

Для адміністратараў

Нашаму сайту спаўняецца 9 гадоў

Нас наведалі

ГодПросмотрыПосетители
2024 19 711 9 262
2023 77 329 36 064
2022 71 163 34 884
2021 55 349 25 349
2020 76 047 36 977
2019 38 372 16 047
2018 32 791 12 093
2017 60 698
10 698
2016 41 163 10 000
2015 46 744 11 395
Всего 519 367 202 769

© ФНКА Беларусаў Расіі. 1999 — 2024 Федэральная нацыянальна-культурная аўтаномія Беларусаў Расіі.

Усе правы абаронены. Пры выкарыстанні любых матэрыялаў сайта, уключаючы графіку і тэксты, актыўная спасылка на belros.org абавязковая.

Калі вы лічыце, што парушаныя вашыя аўтарскія правы, просім паведаміць, каб мы маглі ўнесці неабходныя карэктывы.

Дата стварэння сайта — ліпень 2015 г. | Дызайн сайта | Вэб-майстар