Фестываль беларусаў свету

Другі Фестываль беларусаў свету пройдзе ў Мінску 7-10 верасня.

Першы фестываль мастацтваў беларусаў свету прайшоў у 2011 годзе. Ён сабраў больш за дзвесце прадстаўнікоў беларускай дыяспары з Арменіі, Азербайджана, Казахстана, Кыргызстана, Малдовы, Нідэрландаў, Літвы, Латвіі, Польшчы, Расіі, Украіны і ЗША. Планавалася, што другі фестываль пройдзе ў 2014 годзе, аднак “зоркі не сышліся”.
Сёлета, у 950-тую гадавіну горада Мінска, другі фестываль мастацтваў беларусаў свету нарэшце адбудзецца і супадзе са святкаваньнем юбілея горада.
Чакаецца каля 300 удзельнікаў фестывалю – беларусаў з Аргенціны, Арменіі, Бельгіі, Германіі, Італіі, Іспаніі, Казахстана, Кыргызстана, Малдовы, Мексікі, Латвіі, Літвы, Польшчы, Расіі, Украіны, Францыі, Швейцарыі І Эстоніі.

У праграме свята – канцэрты, выставы, імпрэзы. Фестываль мае адкрыцца 7 верасня на сцэне Беларускай дзяржаўнай філармоніі. У наступныя дні фестывалю прадстаўнікі беларускай дыяспары будуць выступаць з канцэртамі ў аграгарадках і раённых цэнтрах.

Упершыню перад беларускімі гледачамі выступіць творчая вакальная група іспанцаў, якія спяваюць на беларускай мове і захоўваюць традыцыі беларускай народнай творчасці, маладая французская група «Славянская душа» з Ліёна, у рэпертуары якой беларускія, украінскія і рускія песні.

У дні фестывалю ў Нацыянальным мастацкім музеі Беларусі пройдзе выстава работ беларусаў, якія пражываюць у іншых краінах.
У Беларускім дзяржаўным гістарычным музеі адкрыецца фотавыстаўка “Мы – беларусы”, прысвечаная дзейнасці беларускіх аб'яднанняў за мяжой.
Крамя таго, запланаваны экскурсіі, паездкі ў рэгіёны, нашыя госці пазнаёмяцца з культурным, турыстычным і эканамічным патэнцыялам Беларусі.

У рамках фестывалю пройдзе пятае пасяджэнне Кансультатыўнага савета па справах беларусаў замежжа пры міністэрстве культуры.