03.09.2017 735
Мерапрыемствы Дня беларускага пісьменства прайшлі ў Полацку 2-3 верасня 2017 года.
Дзень беларускага пісьменства — дзяржаўнае свята ў Рэспубліцы Беларусь, якое адзначаецца з 1994 года ў першую нядзелю верасня. Штогод свята ладзіцца ў новых гарадах з багатай гістарычнай спадчынай, даўніх цэнтрах асветы, культуры і кнігадрукавання. Сёлета Дзень беларускага пісьменства ў Полацку аб'яднаў разам тры святы – 500-годдзе беларускага кнігадрукавання, 1155-годдзе горада і ўласна дзень пісьменнасці. Святкуючы Дзень беларускага пісьменства, беларусы аддаюць даніну павагі ўсім тым, хто на працягу стагоддзяў ствараў культуру, адукацыю, высокі ўзровень нацыянальнага мастацтва.
У сустрэчах на полацкай зямлі прынялі ўдзел літаратары з дзесяці краін: Расіі, Украіны, Малдовы, Азербайджана, Казахстана, Узбекістана, Літвы, Польшчы, Сербіі, Францыі. І больш за 100 літаратараў з усёй Беларусі. У Музеі беларускага кнігадрукавання адбыўся Міжнародны круглы стол “Дыпламатыя слова: Францыск Скарына ў сусветнай гуманітарнай прасторы”. У гарадскім Палацы культуры прайшоў фінал конкурсу юных чытальнікаў “Жывая класіка”, у якім удзельнічала больш за 13 тысяч школьнікаў.
Падчас свята ў Полацку адбылося ўшанаванне пераможцаў рэспубліканскага конкурсу "Нацыянальная літаратурная прэмія» 2016 года. Удзел у конкурсе прынялі 40 вядомых аўтараў. Найбольш папулярнымі сталі дзве намінацыі - «Паэзія» і «Дзіцячая літаратура». На кожную з іх было пададзена па 10 заявак. Пры выбары пераможцаў журы прымала пад увагу колькасць і змест прадстаўленых аўтарам артыкулаў, рэцэнзій, водгукаў у СМІ, на інтэрнэт-рэсурсах, а таксама колькасць пісьмовых водгукаў чытачоў, пераклады творы на іншыя мовы народаў свету.
Пераможцам у намінацыі «Лепшы твор прозы» стала пісьменніца Людміла Рублеўская за раман «Авантуры Пранцiша Вырвча, здраднiка i канфедэрата». У намінацыі «Лепшы твор паэзіі» перамог Анатоль Аўруцін за кнігу паэзіі «Асвячэнне», у намінацыі «Лепшы твор для дзяцей і юнацтва» - Міхаіл Пазнякоў за кнігу «Возера дзiва». Пераможцам у намінацыі «Лепшы твор драматургіі» стаў Васіль Ткачоў за зборнік п'ес «Характары». Аўтарам лепшага творы публіцыстыкі журы прызнала Зіновія Прыгодзіч за зборнік «Постацi». «Тайнапiс Андрэя Мрыя: падтэкст рэалiй творчасцi пiсьменнiка» Валерыя Назарава перамог у намінацыі «Лепшы твор літаратурнай крытыкі і літаратуразнаўства». Перамогу ў намінацыі «Лепшы дэбют» атрымала Маргарыта Латышкевіч са зборнікам «Яблыкi». Усім пераможцам уручаны дыпломы і сімвалы прэміі.
Беларуская праваслаўная царква скончыла пераклад на беларускую мову Новага Запавету. Пра гэта паведаміў мітрапаліт Павел, кіраўнік БПЦ: “Больш за 25 гадоў нашы навукоўцы, лінгвісты, славісты, перакладчыкі працавалі над перакладам кніг Святога Пісання Новага Запавету. І сёння ў Полацку мы прэзентавалі Новы Запавет на сучаснай беларускай мове”.
Перакладаў Новага Запавету на беларускую мову існуе блізу дзясятка, іх рабілі праваслаўныя, каталікі і пратэстанты. Беларусы маюць тры поўныя пераклады Святога Пісання – Уладзіслава Чарняўскага, Янкі Станкевіча і Васіля Сёмухі.
Саюз пісьменнікаў прадставіў літаратурна-музычную праграму “Як на свет нарадзіўся Янка” па матывах рок-оперы “Курган”. На галоўнай сцэне выступілі беларускія паэты, артысты, музыканты, а каля гарадскога фантана працавала творчая пляцоўка “Слова пісьменніка”, дзе жадаючыя змаглі набыць кнігі, атрымаць аўтографы, пагутарыць з літаратарамі.
Месцам правядзення ХХV-га юбілейнага Дня беларускага пісьменства у 2018 годзе абраны горад Іванава (да 1940 году – Янаў) Брэсцкай вобласці, які багаты гістарычнай спадчынай і духоўнымі традыцыямі народа. На Янаўшчыне (Іванаўшчыне) пачаўся род класіка рускай літаратуры Фёдара Дастаеўскага, культурнага і грамадскага дзеяча Напалеона Орды, многіх сучасных літаратараў.
Аўтар:
ФНКА