Рус | Бел
  Бліжэйшая памятная дата
  Каляндар памятных дат
Супрацоўніцтва
з Выдавецкім домам «Звязда»
«Кнігазбор» выдаў том з рабочымі нататкамі Рыгора Барадуліна

«Кнігазбор» выдаў том з рабочымі нататкамі Рыгора Барадуліна

19.05.2018      284

Дзённікавай памяццю паэта можна смела назваць чарговую кнігу запісаў, рабочых нататак Рыгора Барадуліна, выдадзеную «Кнігазборам».

Ахоплівае чацвёрты па ліку том сведчанні памяці з 1983—1988 гадоў. Якім жа быў гэты перыяд у жыцці майстра слова, нястомнага вандроўніка па Беларусі і свеце? Рыгор Іванавіч пабываў у ЗША як удзельнік чарговай сесіі Генеральнай Асамблеі ААН у складзе дэлегацыі БССР, у Францыі разам з рускімі паэтамі і перакладчыкамі, Польшчы, Балгарыі, Непале і Індыі. Па традыцыі шмат папаездзіў па розных мясцінах Савецкага Саюза. Геаграфія яго зацікаўленняў была звязана з Мурманскам, Масквой, Талінам, Псковам, Таджыкістанам. І беларускія куточкі былі ў полі зроку паэта — ён наведаў Бярэзінскі запаведнік, Баранавічы, Гомель, Полацк, Гродна, Віцебск, Барысаў, Магілёў, Бялынічы, Кублічы, Пуцілкавічы, Ушачы... А колькі сустрэч — з П. Панчанкам, А. Вялюгіным, Героем Савецкага Саюза У. Е. Лабанком... І праз запісы гаворак, уражанняў перад чытачом паўстае яркая, шматгранная асоба нераўнадушнага да жыцця чалавека, творцы, які не проста збіраў уражанні, а спрабаваў разабрацца ў самых галоўных сутнасных праявах чалавечага жыцця.

З цікавасцю, учытваючыся часам у зусім лаканічныя запісы, адкрываеш творчыя задумы пісьменніка. У прадмове «Ад укладальніка» Наталля Давыдзенка (яна сабрала і збірае ўсе тамы запісаў) звяртае ўвагу і на такі праект Рыгора Барадуліна: «...А яшчэ — запісаны шчодра насычаны план задуманай (у кастрычніку 1983 года) разам з М. Стральцовым, але, на жаль, не спраўджанай «Кнігі дружбы», які хочацца прывесці цалкам: «...проза, вершы, экспромт, Прыбалтыка, Азія, Усход, партрэт сяброў, характар культуры, застолле, вяселле, дарога, прывал, самалёт, на валах, начлег, пра пераклады, эпіграмы, партрэты людзей, сяброў, рэчаў (студня, клець, дрэва ля кляштара), нешта з песняў праз рэаліі, Германаў, Куляшоў, Броўка, пра шапку ці пра аборы». І дадаць: дзённікі і запісы паэта ці не працягваюць ствараць год за годам менавіта падобную кнігу?..»

Выданне тамоў памяці Рыгора Барадуліна з агульнай назвай «Дзённікі і запісы» прадаўжаецца. Сачыце за планамі выдавецтва «Кнігазбор» і зазірайце ў кнігарні — не сумнявайцеся, вас чакае чытанне, напоўненае шмат якімі цікавосткамі.

Аўтар: Мікола Раўнапольскі
Вяртанне да спісу

Для адміністратараў

Яндекс.Метрика

© ФНКА Беларусаў Расіі. 1999 — 2019 Федэральная нацыянальна-культурная аўтаномія Беларусаў Расіі.

Усе правы абаронены. Пры выкарыстанні любых матэрыялаў сайта, уключаючы графіку і тэксты, актыўная спасылка на belros.org абавязковая.

Калі вы лічыце, што парушаныя вашыя аўтарскія правы, просім паведаміць, каб мы маглі ўнесці неабходныя карэктывы.

Дата стварэння сайта — ліпень 2015 г. | Дызайн сайта | Вэб-майстар