Пакрыўджаных не будзе

Кіраўніца асацыяцыі “Bellarus” Таццяна Пумпулева, пра якую неаднойчы пісалі і ў “Голасе Радзімы”, гаварыла, што даслаць матэрыялы да конкурсу ёй падказалі ў Пасольстве Беларусі ў Рыме. І вельмі радавалася, стаўшы лаўрэатам. З Беларусі супляменнікі тады атрымалі падарункі: каштоўную метадычную літаратуру, дакументальныя фільмы пра краіну, сувеніры і самае галоўнае — беларускі нацыянальны жаночы касцюм. Усё такое неабходнае ў рабоце! З таго часу пачалося і актыўнае ўзаемадзеянне беларускай італьянкі з землякамі. У верасні хор, створаны пры асацыяцыі, удзельнічаў у Другім фестывалі мастацтваў беларусаў свету, Таццяна была ў Мінску і ў снежні — на вучобе-стажыроўцы для кіраўнікоў творчых калектываў беларусаў замежжа. Часта шле яна прывітанні па электроннай пошце, запрашае на старонкі асацыяцыі ў сацсетках, дзе шмат фота, тэкстаў пра жыццё супляменнікаў у Італіі. Удзельнічала асацыяцыя “Bellarus” і ў сёлетнім конкурсе — і таксама паспяхова. Сярод дасланых матэрыялаў я пабачыла мноства фотаздымкаў са святаў Масленіцы, 8 Сакавіка, Калядаў, Купалля, прэзентацый кніг і аўтарскіх выстаў неапальскіх беларусаў. 

Уражваюць грунтоўныя матэрыялы, якія даслалі таксама іншыя ўдзельнікі. Журы разглядала падрабязныя справаздачы пра дзейнасць за год у выглядзе газетных публікацый, відэа- і аўдыёзапісаў, фотаальбомаў і мультымедыйных прэзентацый. Іх даслалі супляменнікі з казахстанскіх Паўладара і Астаны, латвійскіх Даўгаўпілса, Екабпілса, Елгавы, расійскіх Валгаграда, Кургана, Томска, Новасібірска, Іркуцка, Тальяці, Цюмені, Растова-на-Доне... З Казані ў конкурсе ўдзельнічала суполка “Спадчына”, з Клайпеды — “Крыніца”. Асобным салідным пакетам паступілі матэрыялы ад Саюза беларусаў Латвіі. А з Эстоніі вылучыўся Цэнтр вучобы і развіцця EVA. 

Усяго ж у конкурсе-2015 было амаль 20 удзельнікаў. І вось наступны сказ, я мяркую, вызаве мора станоўчых эмоцый у актывістаў гэтых беларускіх суполках. “Дыпломамі Рэспубліканскага цэнтра нацыянальных культур і таварыства “Радзіма”, а таксама каштоўнымі падарункамі мы ўзнагароджаем усіх сёлетніх канкурсантаў, — запэўніў дырэктар РЦНК Міхаіл Рыбакоў. — Звычайна падыход да вызначэння ўзроўню ўзнагарод дыферэнцаваны (у залежнасці ад грунтоўнасці конкурсных матэрыялаў), але сёлета ўсе дасланыя матэрыялы — цікавыя і разнастайныя”. Што ж, пакрыўжаных не будзе. Ды й мэта конкурсу, па словах кіраўніка Цэнтра, не размеркаванне суполак па нейкіх месцах, а жаданне заахвоціць супляменнікаў за межамі Беларусі актыўней займацца творчай справай: пашыраць беларускую культуру ў свеце. Гэта і магчымасць расказаць пра сябе і свае справы, падзяліцца досведам працы з іншымі. 

Нагадаем, конкурс “Культура” сярод грамадскіх суполак беларускіх супляменнікаў за мяжой на лепшыя дасягненні ў арганізацыі і рэалізацыі праектаў па папулярызацыі беларускай культуры ў краінах, дзе жывуць нашы супляменнікі, праводзіцца з 2012 года. Кожны з удзельнікаў мінулых этапаў конкурсу адзначаны дыпломамі ці падзячнымі лістамі арганізатараў, прызамі. Дарэчы, летась узнагароды большасць удзельнікаў атрымалі пад час правядзення другога Фэсту мастацтваў беларусаў свету ў Мінску, што таксама падкрэслівае важнасць культурніцкай дзейнасці нашых супляменнікаў за мяжой. А сёлетнія ўзнагароды некаторым лаўрэатам уручаліся і ў Маскве, на VI з’ездзе Фэдэральнай нацыянальна-культурнай аўтаноміі “Беларусы Расіі”. 

Праект выклікае вялікую цікавасць сярод беларусаў замежжа. Для лепшага ж інфармавання суайчыннікаў “Голас Радзімы” стаў інфармацыйным спонсарам конкурсу “Культура”. Мы будзем і надалей расказваць пра ўдзельнікаў, прадстаўляць паводле дасланых матэрыялаў станоўчы досвед працы.

Яшчэ фота

Каментары да фатаграфій

1. Дыплом — Аляксандру Сапегу.
2. Любоў Адаскевіч і Ніна Кабанава з дыпломамі лаўрэатаў (першае фота)
3. Фотаздымкі: Кацярына Мядзведская і Іван Ждановіч