Ад Рагачова — да Рагачоўкі

З канкрэтнымі прапановамі аб супрацоўніцтве прыляцела ў Мінск з далёкага Благавешчанска, з Амурскай вобласці Расіі Крысціна Папірная. Наша маладая супляменніца кіруе там прадпрыемствам “Авто Циркон” (дылер беларускіх “Амкадора”, “Гомсельмаша” ды інш.), яна ж — намесніца старшыні па моладзевай палітыцы “Беларускага зямляцтва” Амурскай вобласці. 

Сустракалася Крысціна ў мінскім Доме дружбы з прадстаўнікамі Рагачоўскага райвыканкама пад час трэцяга Форуму рэгіёнаў Беларусі ды Расіі. Расказала спачатку пра беларускую суполку, якая дзейнічае з 2003 года, перадала прывітанне ад яго старышыні Мікалая Васільева. Казала: суполка дапамагла ўжо наладзіць стасункі паміж Далёкаўсходнім дзяржаўным аграрным універсітэтам і Беларускім аграрным тэхнічным універсітэтам. Ёсць абмен студэнцкімі дэлегацыямі. Сябруюць і школы: 86-я мінская і 4-я благавешчанская. Прычым летась вучні з Далёкага Усходу пабывалі на экскурсіі ў Мінску. 

Яшчэ “Беларускае зямляцтва” шукае месцы пахавання беларусаў, што загінулі пад час Другой сусветнай вайны ў жніўні 1945-га як у Амурскай вобласці, так і на тэрыторыі Кітая. Даследуюць актывісты суполкі і гісторыю беларускіх сялян-перасяленцаў. Цікавая, казала Крысціна, тапаніміка заснаваных імі вёсак: дагэтуль існуюць сяло Рагачоўка, вёска Касцюкоўка. А ў сяле Сямёнаўка, вядомым з 1908-га, у савецкія часы існаваў нават калгас пад назвай “Красный белорус”... 

Асабліва зацікавіліся ўдзельнікі мінскай сустрэчы далёкаўсходняй Рагачоўкай. Намеснік старшыні Рагачоўскага райвыканкама Руслан Смірноў прапанаваў наладзіць паміж ёю і беларускім Рагачовам пабрацімскія сувязі. Запрасіў гасцей з Далёкага Усходу на Свята беларускага пісьменства: у верасні райцэнтр будзе яго сталіцаю. А пакуль дамову аб супрацоўніцтве заключылі прадстаўнікі адміністрацыі Рагачоўскага раёна з “Беларускім зямляцтвам”. Кірункі ўзаемадзеяння такія: правядзенне сумеснай акцыі “Карта памяці” пра першых перасяленцаў, вызначэнне назваў-“дублёраў” сёл, гарадоў і губерняў Беларусі, па якіх названыя і населеныя пункты Прыамур’я. У планах — стварэнне клубаў сяброўства, правядзенне відэаканферэнцый. 

Дамова аб супрацоўніцтве была падпісана і паміж бібліятэкамі: Амурскай абласной навуковай імя Мураўёва-Амурскага і Гомельскай абласной імя Леніна. Шукаюць амурскія беларусы і партнёра ў музейнай сферы: вельмі хочацца ім стварыць у Благавешчанску беларускі музей. 

Ад арганізатараў сустрэчы, Рэспубліканскага цэнтра нацыянальных культур і таварыства “Радзіма” Крысціна Папірная атрымала падарункі: беларускія кнігі, кампакт-дыскі з запісамі песень народных і сучасных выканаўцаў, відэамайстар-класы па народных рамёствах. Дырэктар РЦНК Вольга Антоненка запэўніла, што ў Беларусі супляменнікі заўсёды могуць знайсці дапамогу і падтрымку, прычым РЦНК гатовы далучыцца да цікавых узаемакарысных праектаў. 

Руслан Смірноў уручыў супляменніцы салодкі сувенір: згушчонку з Рагачова. На што Крысціна Папірная казала: гэта смак і з яе дзяцінства! Сама ж на этнічнай Радзіме ўжо другі раз. Нарадзілася ў Благавешчанску, а ў Прыамур’е пераехала яе прабабуля — на пачатку мінулага стагоддзя. “Чаму і як там аказалася — нікому ніколі не расказвала: вось такая сямейная тайна, — усміхаецца Крысціна. — Страчаны сувязі з роднымі ў Беларусі, а знайсці іх хацелася б... Я стала бліжэй да радзімы продкаў, далучыўшыся да беларускага руху, прадстаўляю інтарэсы беларусаў у Савеце па нацыянальнай палітыцыі пры Грамадскай палаце вобласці. Па асноўнай працы — таксама “ў беларускай тэме”: займаюся прасоўваннем беларускай сельскагаспадарчай тэхнікі на рынкі Далёкага Усходу”.

Каментар да фатаграфіі

М. Васільеў аб’яднаў беларусаў у Благавешчанску