385 год таму выйшаў у свет "Буквар" Спірыдона Собаля
У Віцебскай абласной бібліятэцы імя У. І. Леніна адбылася міжнародная навукова-практычная канферэнцыя, прысвечаная 385-годдзю выхаду ў свет «Буквара» Спірыдона Собаля. Больш за 50 навукоўцаў, музейных работнікаў, даследчыкаў з Беларусі, Латвіі і Расіі прынялі ў ёй удзел. Разам з бібліятэкай у якасці арганізатараў канферэнцыі выступілі Віцебскі дзяржаўны ўніверсітэт імя П. М. Машэрава і абласны краязнаўчы музей. Па выніках навуковай сустрэчы плануецца выданне другога тома краязнаўчага штогодніка «Віцебскі край», які быў заснаваны сёлета.
Спірыдон Собаль нарадзіўся ў сям'і магілёўскага бурмістра і сваю першую адукацыю атрымаў у Магілёве. У 1630 годзе ён заснаваў пры Куцеінскай лаўры пад Оршай друкарню, якая ў XVІІ стагоддзі стала цэнтрам беларускага кірылічнага кнігадрукавання. Собаль ведаў некалькі моў. Дзякуючы яму выйшлі ў свет каля 20 выданняў. Імем Спірыдона Собаля ў Магілёве названая абласная ўзбуйненая друкарня, а ў Оршы — вуліца.
У бібліятэцы сёлета праходзіць шмат мерапрыемстваў для аматараў гісторыі. У прыватнасці, пасля заканчэння канферэнцыі, прысвечанай «Буквару» 1631 года, зацікаўленыя праслухалі лекцыю «Традыцыі гарадскога самакіравання ў Віцебску». Гэта частка праекта «Віцебск: рэальная і папулярная гісторыя роднага горада». На мінулых лекцыях гісторыкі, аматары даўніны распавядалі пра паселішчы на месцы будучага горада. Гаварылі і пра ролю княгіні Вольгі ў яго старадаўняй гісторыі, ролю скандынаваў у развіцці гандлёвых шляхоў, гарадоў і княстваў на Русі. Вялікую цікавасць выклікала і тэма рэлігійнага жыцця, гарадскога побыту ў Х—ХІІІ стагоддзях.
Каментар да фатаграфіі
Тытульная старонка «Буквара» Спірыдона Собаля, 1631 год, Куцеінская друкарня.