На 65-ым годзе сышоў з жыцця Аляксандр Ціхановіч

Аляксандр Ціхановіч нарадзіўся 13 ліпеня 1952 года ў Мінску. Падчас вучобы ў Сувораўскім ваенным вучылішчы іграў на трубе ў ваенным духавым аркестры. У гэтыя ж гады ўваходзіў у склад маладзёжнага гурта «Факіры», які выконваў папулярныя эстрадныя кампазіцыі.

Скончыў Маладзечанскае музычнае вучылішча імя М.К. Агінскага, у 1982 годзе – Беларускую кансерваторыю. З 1971 года ў Беларускай філармоніі, саліст ВІА «Верасы», граў на бас-гітары і трубе, выконваў вакальныя партыі. Удзельніцай ансамбля «Верасы» была і Ядвіга Паплаўская, якая стала жонкай Ціхановіча. З 1987 года – саліст-вакаліст Дзяржаўнага аркестра сімфанічнай і эстраднай музыкі Беларусі. З 1988 года — стваральнік і кіраўнік (разам з Ядвігай Паплаўскай) першага ў Беларусі Тэатра песні і студыі (у 2003 годзе пераўтвораны ў прадусарскі цэнтр «Прафіартвідыён»). Адначасова з 2001 года — музычны кіраўнік беларускага канала «Сталічнае тэлебачанне». Выступаў з Паплаўскай у складзе эстрадна-вакальнага дуэта. Аўтар папулярных эстрадных песень.

Пасля перамогі на конкурсе «Песня 88» з песняй «Счастливый случай» (музыка Эдуарда Ханка, словы Ларысы Рубальскай) разам з Паплаўскай стварыў дуэт з аднайменнай назвай. У тым самым годзе арганізаваў Тэатр песні Ядвігі Паплаўскай і Аляксандра Ціхановіча, пасля ператвораны ў прадусарскі цэнтр Аляксандра Ціхановіча і Ядвігі Паплаўскай, праз студыю якога прайшло нямала маладых беларускіх выканаўцаў, у тым ліку Аляксандр Саладуха і група «Ляпіс Трубяцкі».

Доўгі час займаўся адборам удзельнікаў Беларусі на «Еўравізію» ў праекце «Еўрафэст». Пры гэтым працягваў актыўна выступаць і гастраляваць у дуэце з жонкай. Аляксандра Рыгоравіча пастаянна запрашалі ў журы конкурсаў, адным з самых яркіх стаў «Звездны дилижанс» на СТВ, які адкрыў такіх артыстаў, як Каця Іванчыкава (IOWA), Дзмітрый Калдун, Аня Шаркунова, Дзмітрый Карпінчык (Герман Цітоў).

Апошні год Аляксандр Рыгоравіч тяжка хварэў, хаця ніколі не скардзіўся і стараўся выглядаць бадзёрым.

Выказваем шчырыя спачуванні родным і блізкім Аляксандра Рыгоравіча. Будзем з удзячнасцю слухаць неўміручыя кампазіцыі, што пакінуў нам Народны артыст.

Смуткуем, любім, слухаем: https://youtu.be/sixERSPKxlA